نور ذا الليلة هجير ما يشابه كل ليلة=قلت أخاف البدر طاح بحيّنا والعالم الله
أثرها من الباب طلة بنت حارتنا الجميلة=وكل ما في هالمجرة اختفى وهي بس طلة
سوت اللي مايتسوى بنورها ذيك الفتيلة=أطفت أنوار الشوارع والكواكب والأهله
قلت أجل لا جات بتطلع للخلايق مايبي له=كل واحد لا يعتّب باب داره أزينٍ له
هي إذا مرّت وصدفة بالطريق اللي أجي له=والله إني لو أدله وشفتها ماعاد أدله
دربها من مرّ به لو بالخطاء يا ويل ويله=هذا أمه ما دعت له خير في ها لدرب لله
ترفة بين العذارى مالها شبه ومثيله=كنها من الحور بس بهيئة إنسانة مطله
أزين إن الله أمرها حجابها لا لا تشيله=خشية الفتنة تصيب المسلم بنظره وتضله
عينها تسوّي سوايا ماتسويها قبيلة=إن غزت تغزي...ومـا شفى للرمش غله
يرحم عظامه جرير وليت هذا الجيل جيله=لو هو شاف عيون...كان كل الشعر خلّه
هن وساع وهن نواعس هن سواد وهن كحيله=تطرح الرجال بس نظرةٍ ثم تشلّه
فيه أحد ياناس يقتل كل من مر فـ سبيله=هي كذا تمشي وتقتل مالها دينٍ ومله
عرفها مابه قصاص إلا القصاص من القتيلة=يصبح المقتول قاتل مايصير القتل زله
هم كثار اللي بغوها لدارهم تصبح حليله=بس ترفض كل مره طالب القرب وتعله
تشترط لوصالها بعض الشروط المستحيلة=كنها تقول: القمر...أبغاه تلّه من محله
قلت: معك الحق والله لو قدرت ألقى الوسيلة=كان جبته لك هديه بس ما اقدر كيف أتلّه
وانتي وش لك بالقمر لا صرتي الشمس الأصيلة=وعن جميع النور انتِ بحد ذاتك مستقلة
أنور وجهك...أشهد إن النور كله ينحني له=والقمر لو هو يتكوّن بدر يعجز ما وصّله
وريقك اللي منتقى منه الرحيق وسلسبيله=العسل لامن تضايق...قلّه: إني الأصل قلّه
والسواد برمشك أصلاً ماترك للكحل حيلة=والكحل ما أظن يرضى يجمّل عيونٍ تذّله
أي ورد وأي زهر وأي بستان وخميلة=للطبيعة سحر...لكن ها لطبيعة مضمحلّه
وأنتي أتممتي غموض الكون والغازه ودلييله=حمرة خدودك وربي إنها أحلى الأدله
هفهف النسناس وحرّك ها لخصال وها لجديلة=قلت: يالنسناس تكفى شعرها بشويش فلّه
شعرها اللي لاتناثر خابره راعي طويلة=ماترك في البنت شبر من الظهر غير
قلت ترفه بنت ناس وكلها حشمة وفضيلة=وما مدحت البنت إلا من سبب تأثير طله
هي عثت فيني وأنا أدري يالربع ماهي قليله=يكفي اللي شفت منها لاتزيد الطين بله
والله لو لا إني مصدِّق بالعلامات الجليلة=كنت أقول: إن القيامة قامت يها الكون كله