لطيفه عطيف



لطيفه عطيف آخر سلالة عطيف والتي اتسمت بالسمنة الفاحشة والأعين الممطوطة والجفون السائحة والخدود المشدودة .. والأفخاذ الملتصقة .. حقا إنها سادية عطيف وليست لطيفه عطيف

( نعود منذ البداية )

لطيفه من يومها صغيره ما ينادونها اخوانها إلا ( أديداس ) وان كانهم أحترموها يقولون يا شحمه وأي دب يطلع في التلفزيون يشبهونها فيه وتروح هي تصيح عند أمها وتقول صح يمه أنا نحيفه .. ايه وأنا أمك بس لو تسمعين كلامي وتحنين يديك أربع سنين عشان معد تاكلين ولعد يعاريونك وتغثيني كل شوي جايه تصيحين ...

* * * *

أمضت ( لطيفة ) طفولتها مع إخوانها تلعب معهم حبشه وعمرها ما مسكت احد كل ما انحاشوا جلسوا في آخر الحوش بع**تهم يتقهوون الين توصلهم ثمن يشيلون عفشهم ويرحون للجهه الثانية ويكملون قهوتهم وهي تمشي لهم كأنها بطريق فيه مشق .. بعدها تمل وتبطل مثل العادة ... وكل ما راحت للثمامه مع أهلها وركبت الدباب ما يدري السوداني من اللي راكب الثاني لدرجة انه مره عصب يوم خلصت الساعة حقت الدوران مسكها مع اذنها وركب على رقبتها يحسبها الدباب ويسحب في أذانيها يبغى يشغلها ويقول بعد خربتوا الدباب وهي تقوله أنا ( لطيفه ) مهوب الدباب يا عم .. استحى السوداني ونزل .. ثمن راحت تركب الحصان من يوم ركبته صار الحصان يقوم ويجلس يقوم ويجلس كنه يسوي بشم حاول يمشي لكن جاه إحساس انه مشلول من الوزن الزايد ... عقبها مات وهو يتمنى انه يكون خروف عشان يموت في الضحيه شهيد بدال هالموته البشعة ..

كانت ( لطيفه ) إنسانه مكافحه تروح للمدرسة والطالبات يتريقون عليها .. اللي تقول وين رقبتك .. واللي تقول ليش خروصك تحك في كتوفك كنها نسافات قلابي يسوقه باكستاني ( طراه ان الباكستانيين يحبون ال**رقه اللي على غير سنع )) طبعا ( لطيفه ) متبلد إحساسها أو بالتحديد ضاغط عليه الشحوم عشان كذا إحساسها لاهي في إبعاد الشحوم ما عنده وقت يتأثر بكلام الناس ..و( لطيفه ) ما كانت اطول في المدرسة لأنها ما تتحمل تجلس على الكرسي إلا أربع ساعات ثمن تستأذن تروح البيت وحدود فخوذها مزرقه من الخشب وتدهنها أمها بفازلين ألين طفح الكيل وراحت للمدرسة وحلت المشكلة مع المديرة وصرفت المديرة لها كنب أبو نفرين من مكتبها عشان تقدر أتابع الدرس بكل أريحيه .. وما أخفيكم ( لطيفه ) إنسانه خدومه قبلها تخدم البنات وتوزي في سفطاتها وتحت شدوقها اللي يهربونه للمدرسة من جوالات وشرايح ومجلات وكتب .. لبت طلبات البنات ومع ذلك ان خلصوا حاجتهم منها بدو يتريقون عليها وحده تقول وش جايبه معك في الدروج والثانية تقول ليش ما تأجرين سرك يا لطيفه على رعاية الشباب عشان يحطونه مسبح دولي .. وترد الثالثة مجنونه أنت وش يعبية كان يجينا جفاف ما يكفي بيبات الشرقيه دمار ... والرابعه تجي عندها معها ههلل تقول وين الفتحه عشان احط الفلوس ويطلع لي ببسي

* * * *

كبرت وكبرت معها أحلامها وصارت تروح وتجي زيارات وزواجات حتى أن أهلها في يوم من الأيام تباطوها يوم دخلوا عليها في غرفتها لقوا وجهها ازرق من المشد والسبب ماتبي احد يشوف شحومها وسفطاتها ... مرت الأيام كمرور الليل على وضح النهار وجاء يوم كانت فيه متغلقه بقوة من الغلقه أن تنهدة تحرك أثاث البيت كله .. جتها أمها يوم حست أنها بتضيع منها وسألتها عن حالها وصارحتها ( لطيفه ) بأن كل زميلاتها تزوجوا إلا هي تخاف تصير مثل مدائن صالح تراث ... ومثل العادة سمعت أمها كلامها وطلعته من نفس الأذن بحكم أن اذنها الثانية مليانه صماخ ( منسده ).. قامت تسوي الغداء وخلتها .. وارتفع انبير الغضب عند ( لطيفه ) ودارت في راسها أفكار كثيرة منها الإنحراف بس همس الشيطان بسرعة في أذنها وقال من زين جسمك لا تطلبيني شي فوق طاقتي ما أقدر اقنع أحد فيك أنسي فكري في الحلال وعساه يجيك ..

عقبها صارت هي تبحث عن الزوج وكلمت خطابات وكل من جاء واحد وشاف جسمها أنحاش وقررت عقبها أنها تسوي رجيم وشرت تكميله من المخزن الكبير وكوتشات عبارة عن قوارب صيد شاقينها من ورى عشان تلبسها وبدت تهرول في مدينة الملك فهد الطبية وهي تمشي وقفوا شباب معهم هايلكس غمارتين مطيح وطلع واحد منهم من الدريشه وهو يناظر ورى ويقول يمين .. يسار .. يمين .. يسار انحرجت ( لطيفه ) والتفتت عليهم وبدت تهرول على الجنب تفحش برجليها وتضمها و ترفع يديها فوق وتحت والشاب اللي ورى يقول فوق تحت يوه العب يا هوووووو مهوب صدر قربه ... وقفت وقالت لهم وش عندكم يا الدشير لا من ورى ولا من قدام مرتاحه من تعليقاتكم ضفوا وجيهكم طلع واحد ضريف يقول على أي صفحه أخذت حصاة ورمتها وهي معصبه على الفهرس وبدت تلعنهم .. شوي جاها واحد أخلاق قالها يا خاله ترى اللعان مهوب زين بعدين يا خوفي تسوين مثل الناس اللي تهرول ومن يوم تخلص تمر مطعم ماما نوره تطلب شاورما وعصير .. أنت احمدي ربك مافيه قسم نسائي وإلا كان توهقتي في كراسيهم هالبايخه رد واحد وهو مار جنبه وقال إلا هم اللي يحمدون ربهم والا كان توهقوا كل ما دخلت عندهم بيفقدون كرسي وبيستحون يقولون لها طلعيه .. فصخت القارب اللي لابسته ورمته عليه وهي تقول شعب متخلف ...

وقفت ونيت شايب وركبت في الصندوق ووصفت له البيت وانطلق وكان فيه تفتيش في الطريق ناظر العسكري ( أبو هديب ) الصندوق وقال للسواق أنت عارف أنه ممنوع تحميل البعارين نطت ( لطيفه ) وقالت وش في أمكم ما قد شفتوا وحده سمينه مسوين فيها أنكم لبنانيين لف عليها ( أبو هديب ) وشاف جسمها ولا كأنه سمعها كتب لها قسيمه تلف الانوار الخلفيه .. مع نقص في هواء الإطارات الخلفية ... ثمن مشاهم

* * * *

كافحت وسوت حمية جامده ما تاكل الا قطعة جبنه مع مويه بس وجت يوم لقت إخوانها حاطين لها الجبنه في مصيدة فيران وكاتبين ورقه صغيره عشاك يا فاره ( لطيفه ) هاجت وحاست البيت كله وتصارخ وش اسوي عشان أنحف عجزت سويت اللي مكتوب في المجلات وقب وجهي نفر طلع كنه كيرم واستخدمت كريمات التنحيف وتمشق جلدي .. وش اسوي عشان افتك من عيارتكم بعدها توطت في بطون اخوانها وترقدوا في المستشفى ... وقالت خلاص قررت أتزوج عشان افتك منكم ابرضى بأقرب شخص يجيني راح أتنازل عن فارس احلامي ...
عقبها نزلت إعلان في الجريدة تطلب فيه زوج ... وجاء من بكره وتقدم لها واحد يوم دخلت عليه في الشوفه الشرعية وتلفتت ورجعت لأمها على طول تقول وينه ليكون عيالك صرفوه .. ترى ابتودس ببطونهم .. قالت لها وهي متردده موجود في المجلس بس أنت دققي النظر شوي وإلا البسي عدساتك وهي تقول عدساتك واحد من اخوانها ماشي للمطبخ قال بصوت عالي .. قصدك يمه تلبس قزازتين الجمس اللي مسويتهم أخذت فنجال ورمت أخوها وهي تقول انا ناقصتك يا جزمه ..

رجعت لطيفه للمجلس ودققت النظر لقت واحد يا الله ينشاف بالعين المجرده يحاول يرقى فوق الكنب عشان يجلس قربت منه وهي شايله الصينيه وتبي تساعده عشان يجلس قامت شاتته شلوت وطار فوق الكنب وتنثر عقاله وشماغه ( العقال جلبة لي رشاش موية والشماغ منديل مطعم الليوان ) التفت بعصبيه وهو يحك مؤخرته توه بيسب يوم شافها قال .. هلا والله بالثلاجة قصدي القمر ... سبلت بعيونها وجلست تسولف معه وتقوله تصدق أني حبيتك من أول نظره وبادلها نفس العبارة ثمن قالت أبقول شي بس لا تزعل مني .. قالها قولي اللي ودك .. ردت عليه بخجل غريبه حجمك صغير كنك توله ضايع غطاها .. مدري هل أنت كنت تاكل وإلا كانت الوالده توريك صور الاكل في المجلات وتقولك هاه شبعت ابتسم وقال أنا إنسان عملي آخر شي أفكر فيه الأكل مو مثلك شكل سريرك في المطبخ ... ضحكت وصبت له بيالة شاهي ومدتها له ومسكها بيده الثنتين وحاول يشيلها لكنها ثقيله وطاحت منه وانكسرت البياله قالت له فداك يا قلبي وصبت له في غطى موية الصحة وهي تقول اشربها قبل ما تبرد ...

مرت أيام الملكة وتزوجته وصارت كل ما راحت محل وهو معها يجيها من يقول يا خاله ترى فيه شي طاح منك وإلا ان جت تقطع الشارع وقابلها شايب قالها خلي ولدك هاللي معك يتعلق في عباتك .. وأن سيرت على سوق وهو معها أغثاها في السوق ابشتري نعال ابشتري نعال ألين ملت ودخلته محل أطفال وهي تقول يا الله خذلك جزمه والا صندل شرى اللي يبي همن طلعوا وقالت له بصوة شريت لك بلبتوز بطقطق بدال سراويل السنه هاللي تسحب عليك صاير مسبل .. وشريت لك بعد جزمه أم لمباة عشان أن بعدت عني أشوفك خبرك هالأيام الخطف منتشر ولا أبي اشوفك عند أحد هالأشارات يد طويله ويد قصيرة كنك عقارب ساعة ... وهي تسولف ماسكه يده بطريقة تجيب شد عضل هي مورمه وجنوبها على شحوم زندها رافعين مرفقها فوق وهو ماد يده عن جهدها كله عشان يقدر يمسك يدها وتمشيبه وتسحبه معها كنه باربي في يدها الين جتها حرمه قالت خافي الله في هالضعيف اللي معك كلها خطوتين وتمشين بيده بس بدون جسمه مصعتية يا الدبا ... قالها البصوة يسلم راسك يا عسل على هالدخله اللي بتنقذ يدي منها . .

عصبت ( لطيفه ) وقالت بعصبيه وش دخلك زوجي وأنا حره فيه .. قامت لقطته بيده وراحت للفندق وجلست في اللبي وهي تقوله شف ان كلمت بنت ترى اخر ما بيني وبينك .. قالها وش ذنبي اني حلو وخلى قلبها يرق عشاني قالت وش حلو انت وهالشراب اللي لابسه على بالك انه ثوب .. أنت ترى ولا شي شف ضروسك اللي كنها اصابع بيانو .. وهم جالسين يتناقشون جاء واحد حول وشاف زوجها ( البصوة ) قاله مو معقول الشيخ ( الالوسي ) زين شفتك هنا قلب البصوة عيونه وقاله الحول انا اللي اتصلت على قناة كنوز ورديت علي أنت وقلت لك أن الوان غرفتي تتقلب وقلت لي ولع شموع وشب في ستارة غرفتك لأن فيه خندروس كبير الجان متوزي ورى الستاره يقضي حاجته وسألتك ليش يقضي حاجته قلت لي بتريقة حمامهم منسد... جلس يناظره ( البصوه ) وهو يقول يا خوي تراك غلطان هذاك شخص ثاني نتشارك انا وياه في نفس القامة فقط .. قاطعه الحول طول عمرك متواضع يا الألوسي ... تنهدت ( لطيفه ) والبرقع يروح ويجي وهي تقول يا الحبيب ترى هذاك ساحر يعني كافر ملحد ومشرك بالله سبحانه من عيونك شكلك جيت بتتصل على قناة المجد دقيت على قناة كنوز ناظرها الحول وسمى بالله والتفت على البصوه وقاله ممكن يا شيخ تصرف المارد اللي معك عشان اعرف أتكلم .. قامت لطيفه ومسكته مع علباه وترجف فيه وتصارخ نعنبوكم يا متخلفين تمشون ورى اللي ينصبون عليكم ومسوين أنفسكم ذيابه انه محد يلعب عليكم فتحوا عقولكم هذا اذا كان فيه عقول من الأساس وما طلع جريش خربان .. هذا انسان ساحر ما يخاف الله كيف تسمية شيخ والا عشان عيونك صايره سيفين متقاطعه كنها علم السعوديه معد تفرق ..

رمته بعيد وقالت للبصوة .. قم يا عقلة خلنا نمشي معد أبي أجلس هنا .. طلعوا من الفندق ودور السواق اللي بيوديهم وقالت ورى ما تسوق انت من يوم أخذتك ما شفتك تسوق .. قالها بقرف عشان اسوق لازم اقطع نفسي نصفين نصف فوق والنصف الثاني تحت .. ركبت هي مكان السواق وقالت تعال نط في حجري امسك الدركسون وانا ادوس البنزين والفرامل .. ركب وشغل السياره وداست هي بنزين وهو يلعب برجليه ويقول صدق يا ( لطيفه ) ننفع أنا وياك دوتوا في السياره أنا أمسك الدركسون وأنت تدوسين بنزين وفرامل وبعدين فيك ميزه قالت له بدلع وش الميزه يا قلبي .. قالها فخوذك اريح من المرتبه حقت السياره واضح انك كنت تاكلين سفنج وأنت صغيره صفقته على راسه ونشب سنه في الدركسون ولف غصب عنه وقامت السياره تدور والناس تكبس بالنور والدوريات وراهم .. جلسوا يلفون بالسياره الين ضربت في رصيف وانقلبت .. واستقرت على التنده وجاء راعي المرور واتصلوا على الإسعاف والدفاع المدني .. طبعا آخر من جاء الدفاع المدني عشان يقص الباب ... جوا وسألوا عن الاحداثيات قالهم المرور واضح من الشكل العام ان اللي يسوق السياره كنغر لابس عباة سوداء وفي حجره طفل سعودي ومن شنبه يبين لنا انه قزم ..

ساعدوهم الدفاع المدني ... واضطروا يجيبون رافعة صبات عشان يطلعون ( لطيفه ) والناس متجمهرين .. وشالوها للمستشفى ومن بكره نزلت صورتها في الجريده ماليه الصفحة ومكتوب على جنب ا لصفحه بخط صغير باقي الجسم يتبع في العدد القادم ..

جلست في المستشفى تتشكى من كلاها .. وتتألم وتجمع الكادر الطبي واقروا لها عملية شفط دهون .. وعملوا الفحوصات اللازمة وقالوا لها بتخشين العملية بعد ساعة قالت أبي اشوف زوجي قبل ... جابوه لها في سرير مواليد حاطين عليه لمبة زرقاء عشان الصفار لانه عقب القلبه جته روعه وصار اصفر .. طلت عليه لقته مجبص من وإلى وحاطين شفاط عصير بين شفايفه عشان يتنفس منه .. قالت انتم متأكدين ان حنا في مستشفى والا في مطعم وش هالشفاط ما فيه تقنية أفضل من كذا وهللي عليه جبص والا لافينه بعجينة السنبلة ... ناظر الدكتور ساعته .. وناظر وجه ( لطيفه ) وقال مشاء الله وشك كبير ردة فيه الروح وبأى عامل زي مضمار الخيل ان شاء الله اطمنت على قوزك يالله ودالوئتي عاغرفة العمليات ... بعدها شالوها لغرفة العمليات سبعه يدفون السرير كنهم ينتشون جمس ..
التفوا الدكاتره عليها من كل جهه وقرب دكتور البنج بدال ما يحط لها اكسجين البنج قالها افتحي فمك فتحته وشال اسطوانة البنج ورماها جوى وقالها امضغيها وعساهي تنومك ...

أمضت في غرفة العمليات يوم ونص والدكاتره لابسين فراهيل وكل واحد يطلع من غرفة العمليات يدف معه عربية ام كفر حقت شحنة التراب محمل فيها شحم ( لطيفه ) يروح يكب هالشحم في حديقة المستشفى ويجي لغرفة العمليات وقف قلبها مرتين لكن الصيانة حقين المستشفى قدروا يأمنون ويجيبون تريلا ويمدون اشتراك مع دريشة غرفة العمليات ويسوون لها اشتراك عن طريق صدرها ...

بعد مضي ثلاثة أيام متواصله في العمل دخل الكادر الطبي موسوعة جينيس وطلعت لطيفه من الغرفة وهي لابسه وزار كروهات ونحيفة وتسبب لها الشفط في مضاعافات وألم في المرارة وتعب .. جلست اسبوع في المستشفى يوم جت تمشي قالوا لها الامانات تعالي وقعي على استلام عهدة قالت أي عهدة قالوا وحنا اثناء العملية .. لقينا في سفطات جسمك حاجات غريبه جوالات وسيديات وجزم حريمي .. ودي في دي بغينا نبلغ عنك انك حرميه بس من حسن حضك كان فيه زميلتك شرحت لنا السالفه انك كنت تهربين هالاغراض أيام المدرسة والظاهر أن أصحابها يوم طلبوها منك ما عرفتي اطلعينها لهم بحكم أنك ما سويتي فهرسه للرفوف .. بس تبين الصراحة يا أخت ( لطيفه ) كل اللي لقيناه كوم وأن حنا نلقى غراش معسل وجراك كوم ثاني هل كان جسمك مشروع قهوة وازالته البلديه .. والا وش القصه .. ناظرته بطرف عين وقالت هذا الله يسلمك كنت كل ما اشوف اخواني يشيشون والا يشربون اخذها منهم واوزيها في هالسفطات ...

على نهاية كلامها جت الصحافة حاوطتها وقاموا يسألونها عن رايها في الشفط وهل تنصح الناس فيه قالت بالعكس أنا أقول ان الحمية الطبيعيه أحسن بكثير من عمل شي ممكن يضر الشخص .. والشفط مو بالضرورة ينجح خصوصا ان فيه بنج وتقطيع وشيل ويجي بعده شد الجلد والجلد تحته أعصاب وعروق حساسة ...
عشان كذا الواحد لازم يخسس بالطريقة العادية ويكون قوي الإرادة وما يأجل الرجيم لان كل كيلوا زيادة يثقل عليه وينهكه في المشي وممارسة الحياة العملية ..

هاهي كانت قصة ( لطيفه عطيف ) التي أصبحت الآن سيدة أعمال مع جسمها الجديد النحيل ومازال زوجهاه البصوة في الجبس لتطلق عليه الصحافة المومياء ولتصرح ( لطيفه ) بعد مدة في مجلة روتانا سينما عن اكثر شي تفتقده
لتقول بكل حزن بأنها تفتقد الصفطات التي كانت بالنسبة لها حياتها وكم تتمنى بأن يكون لديها صفطات ولو صغيره حتى تضع خواتمها الألماس فيها ...

ما يستفاد
1- اللي خلص قرايه أول واحد يقوم يجب لي موية من الثلاجة
2- ان الصفطات مهما كانت مقرفه تضل اهون من العمليات ووجع الراس
3- اللي جاب كاس المويه يرجعه للمطبخ عشان ما ينكسر

القصه حلوه بس انا ماجبت لك مويه اسفه هههههههههههههههههههه

يسلمو اخوي ..

حلوووووووووووووووووووووويه ..

مش حتشوفي مني حاجه ..

السلام عليكم ورحمة الله وبركاته



يعطيك الله الف عافية

على

القصة الحلوة