أنت وانا نوقف على ذكرى الا طلال = ونصور الماضي تحت نظرة العين
نتذكر أيام الصبا وسيحة البال = ونشوف ماضي راح له عدة سنين
صحيح مابه شيء يبقى على حال = بعد الطفولة شوف صرنا كبارين
حنا كبرنا ونشوة الحب ماتزال = في قلوبنا تكبر سوات الرياحين
كنا انتقابل يو انا وانتي اطفال = أطل في وجهك وفيني تطلين
تجين للدكان تمشين بريال = ماهو على شاني تبين اتقضين
وأطلب حلاوة عود من يدك بالفال = وزعلك ساعة وبعدين ترضين
تذكري يابنت هذيك الأحوال = أيام كنا نسكن بيوت من طين
ولاكنت أعرف إني لك صرت ميال = وأصير في حبك في صف المجانين
أنتي وأنا تاريخ يحكي للأجيال = قصة غرام مدونة للمحبين
قصة غرام أنتي وأنا فيها الأبطال = أحداثها تجرح قلوب الشقيين
ما همنا هرجة حواسد وعزال = كنا نقوم بدور حب السلاطين
أنا بدوي شاعر وفارس وخيال = ومثل ماقالوا عادة البدو صلفين
رجالنا يهزم ثمانين رجال = أهل الزعامة ندعس الصعب ويلين
حنا بدو ما همنا كثرة المال = نسكن برؤوس جبال مثل الشياهين
حنا لنا في المجد مسكن منزال = اهل المواقف في اول الوقت والحين
هذا وانا جرحي على القلب يجتال = جرح عطيب ولا لقاله مداوين
باصبر لو ان الصبر يذبح إلى طال = والله يعجل بالفرج ياريش العين
مادام تحذوني على شوفك آمال = جرحي يطيب إذا تحققت يازين