يازين يوم اني انا وانتي صغار= توما لبست شماغ وانتي عبايه
بالطول ماناصل ولا خمسة اشبار=دايم نقيس اطوالنا بالمرايه
مابيننا شين نخبيه واسرار=ماغير لعب اطفال كل الحكايه
ماهمنا موجز ولا نشرة اخبار=التسليه صارت وسيله وغايه
وان جا فلم كرتون للقطو والفار=نجلس نتابع قصته للنهايه
بالمدرسه نزعل على شان الاصفار=انتي سبب لعبك وانا من غبايه
ياما تهاوشنا على كيس فيشار=انحاش به وافرح بطردك ورايه
وان قلتي ياراشد ياويلك من النار=اخاف واستسلم وابين خطايه
والى ضربتيني تقل بيننا ثار=وان قلت كافي قلتي ماهو كفايه
والى خلصتي ضرب بيمين ويسار=اخذتي الفيشار واللي معايه
والى زعلت وقلت ابا اروح للدار=صحتي وقلتي اسفه يا غلايه
واصدقك وافرح بعد ذيك الاعذار=واجيك لا حاقد والا احمل وشايه
بس لو اشوفك مع بشرغيري اغار=لو كان اخوي أو من أعز اصدقايه
واركض لخوك اقول شفها مع اكبار=عشان يفرض لي عليك الوصايه
هذي طفولتنا براءه وتذكار=دايم نحن اليا ذكرنا البدايه
واليوم ابا اكتبها سواليف واشعار=وافكر انتجها بفلم وروايه