يحيا الزعيـــم

نظراً لأن النعمة فاقت حدها

و لأننا مش قدها

و لأن فعلاً إنجزاتك

فوق طاقتنا نعدها

ولأننا غرقنا في جمايل

مستحيل هنردها

نستحلفك

نسترحمك

نستعطفك

نستكرمك

ترحمنا من طلعة جنابك

حبتين

عايزين جرب خلقة تانية

و لو يومين

إسمع بقي

احنا زهقنا من النعيم

و نفسنا في يومين شقي

عايزين نجرب الاضطهاد

و نعوم ونغرق في الفساد

بيني و بينك حضرتك

دا شعب فقري مايستحقش

جنتك

أنا عارفه شعب ما ينفعوش

إلا شارون و بلير وبوش

عايز يجرب الامتهان

و يعيش عميل الأمريكان

يمد غازه لإسرائيل

ويومين كمان و يمد نيل

أهو يعني نشرب ميه واحدة

ندوب في بعض

ماء و ماء وماء

و نفض سيرة الانتماء

و بلاها نعرة وطنطنة

تبقي البلاد مستوطنة

متسلـــطنة بالسرطنـة

إيه اللي خدناه من الكرامة و الاباء

حبة خطب وكلام كلام

احنا رهنا ع النظام

و رضينا بخيار السلام

بخيــــــــــــار

حنسد عين الشمس بيه

علشان مايطلعش النهار

يطلع لمين

حبة معارضة مغرضين ؟!!!!

و حسب بيان السلطة

شلة مأجورين

يا عم فضك سيرة

وارضي بقسمتك

دا شعب مش فاهم أكيد

يلا اطرده من رحمتك

وإن كنت غاوي الحكم

خليك مطرحك

هاغطس و أقب و أعود

بشعب يريحك

راضي و عمره ما يجرحك.

أخرس و مابيسمعش

وأعميلك كمان عنيه

مش كل قرش يبص فيه

ما يقولش لأ ، وفين ، وليه

يضرب ينفض في السليم

و علي الصراط المستقيم

كل اللي يعرف ينطقه

عاش الزعيــم

يحيا الزعيــم

 

 

صح لسانك

كلمات حلوه الصراحه تسر الخاطر....

واشكرك على هذا الابداع الجميل

والله لا يحرمنا من يديدك.

دمت بود

سحابة خير